ប្រវត្តិរបស់អង្គការសេដាក
ចក្ខុវិស័យ និងបេសកកម្ម
សង្ខេបកម្មវិធីសំខាន់ៗ
កម្មវិធីនៅតាមមូលដ្ឋាន
ស្រាវជ្រាវ និងការបោះពុម្ពផ្សាយ
ការផ្សព្វផ្សាយ
កម្មវិធីគាំទ្រសហគ្រាសកសិកម្ម
វិទ្យាស្ថានអភិវឌ្ឍន៍មូលដ្ឋាន សេដាក
រចនាសម្ព័ន្ធអង្គការ

មជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា (សេដាក)​ គឺជាអង្គការកសិកម្មនិងអភិវឌ្ឍន៍ជនបទ​ដែល បានបង្កើតឡើងនៅខែសីហា ឆ្នាំ១៩៩៧ ដោយមានការគាំទ្រដំបូងពីអង្គការបារាំងមានឈ្មោះថា​ហ្គ្រេត ។ មជ្ឈមណ្ឌលនេះត្រូវបានបង្កើតឡើងដើម្បីធ្វើការងារអភិវឌ្ឍន៍ផ្នែក កសិកម្មជាលក្ខណៈគ្រួសារតាម គោលការណ៍ធម្មជាតិ និងដើម្បីជម្រុញចលនាសហការ និងការជួយគ្នាទៅវិញទៅមកនៅតាមតំបន់ ជនបទនៃប្រទេសកម្ពុជា ។
រហូតមកដល់ខែ មករា ឆ្នាំ ២០០៨​ នេះ សេដាកបាននឹងកំពុងតែធ្វើការយ៉ាង សកម្មនៅក្នុងភូមិចំនួន ប្រមាណ ១៩០ភូមិ នៅក្នុងខេត្តចំនួន ១៧ ទូទាំង ប្រទេសកម្ពុជា។ កសិករប្រមាណ ៧០០០០ គ្រួសារ បានទទួលផលប្រយោជន៍ពីកម្មវិធីកសិកម្ម និងអភិវឌ្ឍន៍ជនបទរបស់យើង ។ កសិករមកពីភូមិចំនួន ១២០០ ត្រូវបានគាំទ្រនិង ជម្រុញឲបង្កើតជា សមាគមកសិករនៅតាមភូមិដែលត្រូវបានចងក្រង សហព័ន្ធជាបណ្តាញថ្នាក់ជាតិ ដែលយើងហៅថា បណ្តាញកសិករនិងធម្មជាតិ ។

សេដាក មានចក្ខុវិស័យចង់បានសង្គមកម្ពុជាមួយ ដែលគ្រួសារកសិករមានជីវភាពធូរធារ មានការ សហការគ្នាទៅវិញទៅមកយ៉ាងរឹងមាំ មានសិទ្ធិនិងអំណាចក្នុងការកំណត់ជោគវាសនាដោយខ្លួនឯង ព្រមទាំងដើរតួរនាទីយ៉ាងសំខាន់ក្នុងការផ្គត់ផ្គង់ ស្បៀងអាហារប្រកបដោយសុវត្ថិភាពដល់សង្គម ទាំងមូល ។
សេដាក មានការបេ្តជ្ញាចិត្តខ្ពស់ក្នុងការធ្វើការដើម្បីបង្កើនគុណភាពជីវិត របស់គ្រួសារកសិករ និង អ្នកបរិភោគតាមរយៈការអភិវឌ្ឍន៍កសិកម្មជា លក្ខណៈគ្រួសារតាមគោលការណ៍ធម្មជាតិ និង សហគ្រាសកសិកម្ម ដែលមានការទទួលខុសត្រូវចំពោះសង្គម ។

កម្មវិធី និងសេវាកម្មសំខាន់ៗ​ របស់សេដាក រួមមានៈ

• កម្មវិធីអភិវឌ្ឍន៍កសិកម្ម និងសង្គម
• កម្មវិធីគាំទ្រសហគ្រាសកសិកម្ម
• វិទ្យាស្ថានអភិវឌ្ឍន៍មូលដ្ឋាន សេដាក ។

សកម្មភាព និងសេវាកម្មសំខាន់ៗរបស់កម្មវិធីអភិវឌ្ឍន៍កសិកម្មនិងសង្គមរួមមានៈ

• ការស្រាវជ្រាវពិសោធន៍​ និងផ្សព្វផ្សាយដែលដឹកនាំដោយកសិករ
• បង្កើនសមត្ថភាពដល់អង្គការ និងបណ្តាញអ្នកផលិត ក៏ដូចជាផ្សារភ្ជាប់ពួកគេទៅនឹងទីផ្សារ
• ការបង្កើនសមត្ថភាពដល់ក្រុម និងបណ្តាញសន្សំប្រាក់នៅតាមមូលដ្ឋាន
• ការបង្កើនសមត្ថភាពដល់សហគមន៍អ្នកប្រើប្រាស់ទឹក
• ការបង្កើនកម្រិតជីវភាពរស់នៅ និងស្ថានភាពរស់នៅរបស់ក្រុមជនក្រក្រីជនងាយរងគ្រោះ និងក្រុមដែលគេមិនសូវរាប់រកនៅក្នុងសង្គម
• ការចូលរួមចំណែកដល់ការអភិវឌ្ឍន៍នៃអភិបាលកិច្ចមូលដ្ឋាន​ តាមបែបប្រជាធិបតេយ្យ

• ធ្វើការសិក្សាពីលទ្ធភាពរបស់គម្រោង ការសិក្សាវាយតម្លៃគម្រោង
• ការសិក្សាស្រាវជ្រាវទៅលើវិស័យកសិកម្ម និងសេដ្ឋកិច្ចសង្គម
• ការសិក្សាលើសកម្មភាពដើម្បីអភិវឌ្ឍន៍គំនិតផ្តួចផ្តើម

• ទស្សនាវដ្តីកសិករប្រចាំខែ
• កូនសៀវភៅតូចៗសម្រាប់កសិករ និងអ្នកធ្វើការផ្សព្វផ្សាយ
• ឧបករណ៍សម្រាប់ជំនួយដល់ការបណ្តុះបណ្តាលរៀនសូត្រ និងផ្សព្វផ្សាយ

ចំណុចផ្តោតសំខាន់របស់កម្មវិធីគាំទ្រសហគ្រាសកសិកម្ម គឺការវិនិយោគ ផ្តល់នូវការបង្កើនសមត្ថភាព និងការគាំទ្រផែ្នកគ្រប់គ្រងទៅដល់សហគ្រាស ដែលមានបំណងធានាឲអ្នកផលិតទទួលនូវតម្លៃ សមស្របចំពោះផលិតផល របស់ខ្លួន ។ សហគ្រាសដែលទទួលបានការគាំទ្រនេះក៏ខិតខំផងដែរក្នុងការ ធានាដល់អ្នកបរិភោគដើម្បីទទួលបាននូវចំណីអាហារ និងផលិតផលកសិកម្មដែល មានគុណភាព និង សុវត្ថិភាពខ្ពស់ ក៏ដូចជាប្រមូលនូវចំណូលដើម្បី ផ្គត់ផ្គង់ដល់សកម្មភាពការងារអភិរក្ស និងអភិវឌ្ឍន៍ ផងដែរ ។
សហគ្រាសសំខាន់ៗដែលកាន់កាប់ និងគ្រប់គ្រងដោយសេដាក​ គឺ៑ៈ

• ហាងកសិផលធម្មជាតិ (ភាគច្រើនមានលក់អង្ករសរីរាង្គ បន្លែ ផ្លែឈើ និងសាច់មាន់ សាច់ជ្រូកផលិតតាមគោលការណ៍ធម្មជាតិ)
• ភោជនីយដ្ឋានបក្សីស្រុក
• ទីផ្សារឧបករណ៍ និងគ្រឿងប្រើប្រាស់កសិកម្មក្នុងស្រុក
• សហករណ៍ឥណទានសេដាកៈ ឯកទេសខាងផ្តល់ឥណទាន ដើម្បីគាំទ្រដល់ការអភិវឌ្ឍន៍ សហគ្រាសកសិកម្ម ។

យើងក៏បានធ្វើការគាំទ្រដល់ជំនួញសហគមន៍មួយចំនួនផងដែរដូចជាៈ

• ផ្សារណាត់កសិករ (ជំនួញផ្ទាល់រវាងអ្នកផលិត និងអ្នកបរិភោគ)
• ផ្សារសហគមន៍
• កុងស៊ីកាប់មាន់ និងកុងស៊ីកាប់ជ្រូកតាមសហគមន៍។ល។

បន្ថែមលើនេះទៀត យើងកំពុងតែធ្វើការសិក្សាពីលទ្ធភាព ដើម្បីបង្កើតនូវសហគ្រាស ផលិតចំណីសត្វ ធម្មជាតិ ជីធម្មជាតិ និងសហគ្រាសផលិតចំណីអាហារ ។

កម្មវិធីរបស់វិទ្យាស្ថាននឹងធ្វើការផ្តោតសំខាន់លើការបណ្តុះឲមនុស្ស ចេះមានជំនាញដូចជាៈ សហគ្រិនកសិកម្ម អ្នកដឹកនាំសហគមន៍ អ្នកដឹកនាំអង្គការកសិករ​ អ្នកដឹកនាំអង្គការជំនួញសហគមន៍ អ្នកជំនាញ អភិវឌ្ឍន៍ជនបទ និងជាអ្នកធ្វើផែនការអភិវឌ្ឍន៍មូលដ្ឋាន ។
វិទ្យាស្ថាន ក៏នឹងចាត់ចែងឲមានជាបណ្ណាគារមួយដែលផ្តោតសំខាន់លើការលក់ និងចែកចាយឯកសារ ទាក់ទងកសិកម្មបរិស្ថាន និងអភិវឌ្ឍន៍ជនបទ ។

• សមាជ ជាសមាជបុគ្គលិក និងមិនមែនជាបុគ្គលិក
• ក្រុមប្រឹក្សាភិបាលសេដាក (មានសមាជិកចំនួន ៧ រូប ដែលធ្វើការបោះឆ្នោតជារៀងរាល់បីឆ្នាំម្តង ដោយសមាជ)
• គណៈកម្មាធិការដឹកនាំសេដាក មានសមាជិកចំនួន ៩ រូប ដែលធ្វើការបោះឆ្នោត ជារៀងរាល់ពីរឆ្នាំម្តងដោយសមាជ
• ក្រុមសម្របសម្រួល សេដាក
• គណៈកម្មាធិការគ្រប់គ្រង​ ។

• បទពិសោធន៍
  ចិញ្ចឹមប្រចៀវ
• បទពិសោធន៍
  ធ្វើម្ទេស ​ប្លោក​ក្រៀម
• បទពិសោធន៍
  ធ្វើស្ករត្នោត ហុយ
• មមាចត្នោត និងវិធានការ​ណ៍ ការពារ